د طب پوهنځی پېژندنه

ميرويس نيکه د لوړو زده کړو مؤسسي د طب پوهنځی لنډه پيژندنه

طب پوهنځی د ميرويس نيکه د لوړو زده کړو مؤسســـي په اډانه کی د لوړو زده كړو وزارت له قانون او مقرراتو سره سم د ځوان نسل د سالمي مسلکي روزني په موخه په ۱۳۹۰ لمریز (۲۰۱۲ میلادي) کال کي په کندهار ولایت کي د لومړني خصوصي طب پوهنځی په توګه پرانیستل شو. د طب پوهنځی د لومړي دوري محصلین په ۱۳۹۰ لمریز کال کي جذب شول چي د خپلي تحصیلي دوري تر بشپړولو وروسته د ۱۳۹۶ لمریز کال په وروستیو کي له پوهنځی فارغ شول او د خپل فراغت جشن یي ولمانځه. له طب پوهنځی څخه لا تر اوسه اوه سوه نولس تنه فارغ سوي او د ځوانانو ډاکټرانو په توګه ټولني ته وړاندي سوي دي.

په طب پوهنځی کي د هیواد له ګوټ ګوټ په ځانګړي توګه سهیل لویدیځي حوزي څخه ځوانان په زده کړو بوخت دی.

د طب پوهنځی د زده کړو چاري د دودیریش تنو مجربو استادانو له خوا چی ډیری یی په خپلو اړونده برخو کي د ماستري زده کړي، تخصصي یا فوق تخصصي زده کړي لري،تر سره کیږي. زده کړي د طب پوهنځی لپاره د لوړو زده کړو وزارت له خوا د منل سوي کوریکولم پر بنسټ په عملي او نظري توګه ورکول کیږي.

د طب پوهنځی په چوکات کی د محصلینو د عملي وړتیاوو د لوړولو په موخه ښه سمبال لابراتوارونه چی محصلینو ته د کیمیا،فزیک، بیولوژی، اناتومی، فزیولوژی، مایکرو بیولوژی، پتالوژي او هستولوژی په برخو کی عملي زده کړي ورکول کیږي، شتون لري. ددی تر څنګ د سیمی په کچه په دوه ښه سمبال خصوصي روغتونونو کي او هم د پوهنځی په تدریسي روغتون کي محصلینو ته عملي زده کړي ورکول سوي.

د پوهنځی د تدریسي روغتون د ودانولو چاري په ۱۳۹۹لمریز کال کي پیل سوي او په ۱۴۰۰ کال کي بشپړي سوي او په فعالیت يي پیل وکړ. د محصلینو د علمی وړتیاوو د لا بډاینی په موخه ښه سمبال کتابتون چی هر راز طبي کتابونه د بریښنایی کتابونوپه ګډون په کی شتون لري، همدا شان د معلوماتی تکنالوژی مرکز چی په کی د انترنیت آسانتیا او په کمپیوترونو سمبال کمپیوتر لب شتون لري.کمپیوتر لب او کتابتون هر وخت د محصلینو او استادانو پر مخ پرانیستی دی.د طب پوهنځی تدریسي او اداري چاري د ميرويس نيکه د لوړو زده کړو مؤسسی په ودانۍ کی چی په دریو پوړوڼو کی ودانه سوي، تر سره کیږي. د یادولو وړ ده چی ټول تدریسـي ټولګي د نني عصر د غوښتنو سره سم په سمعي او بصري وسایلو سمبال سوي او استادان د نوموړیو وسایلو څخه په ګټه اخیستني د زده کړو چاري پر مخ بیایي.

د پوهنځی رئیس دنافذه قوانینو،لایحو او مقرراتو او هم د مؤسسې د عمومي رئیس د هدایت سره سم د پوهنځی اکاډمیکي او اداري چاري پر مخ وړي، د پوهنځی ریس د پوهنځی د علمي شورا د ریاست تر څنګ د پوهڼخي له ټولو اداري،تدریسـي، څیړنیزو او دسپلیني چارو څارنه کوي.د پوهنځی تدریسـي مدیر د پوهنځی د تدریسـي او اداري چارو په برخه کي د دندي لایحي ته په کتو سره ورسپارل سوي دندي د پوهنځی د ریاست تر څار لاندي تر سره کوي.

اوس مهال طب پوهنځی د هیواد او په ځانګړي توګه د سهیل لویدیځی حوزي په کچه یو منل شوی با اعتباره پوهنځی شمیرل کیږي، د میرویس نیکه لوړو زده کړو مؤسسې طب پوهنځی ټولني ته د طب په برخه کي د ښه روزل شویو فارغانو په وړاندي کولو سره خپله ونډه د هیواد د روغتیایي سیستم د پیاوړتیا په برخه کي او د هیوادوالو د روغتیا د لاښه والي په برخه کي تر سره کړی ده..

لر ليد (Vision)

د میرویس نیکه لوړو زده کړو مؤسسې طب پوهنځی به د سیمي په کچه د طبي لوړو زده کړو او د څیړنو د تر سره کولو معیاري بنسټ وی.

رسالت (Mission)

د میرویس نیکه لوړو زده کړو مؤسسې طب پوهنځی هڅه کړي ده چي د طبي زده کړو په برخه کي علمي کادرونه وروزي او د ډاکټرانو په توګه یي ټولني ته وړاندي کړي.

هدف (Goal)

ټولني ته د پوه، مجربواو مستعدو روغتیایي کارکونکو وړاندي کول تر څو باکیفیته روغتیایي خدمتونه خلکو ته وړاندي کړي
د داسی اکادمیک چاپیریال برابرول تر څو استادان ،محصلین او اداري کارکونکي خپلي علمي وړتیاوي یو له بل سره شریکي کړي
استادانو او محصلینو ته د څیړنیزو آسانتیاوو برابرول

ستراتیژیکي موخي

د لوړو زده کړو پر کیفیت ټینګار تر څو فارغان د ټولني د اړتیاوو د لیري کولو جوګه شي
د کادرونو او اداري کارکونکو د وړتیاوو لوړول
محصلینو ته د اړینو خدمتونو تر سره کول تر څو باکیفیته لوړو زده کړو ته لار هواره شي
د څیړنو د تر سره کولو لپاره د آسانتیاوو برابرول
د پوهنځی پراختیا په علمي،اداري او بنسټیزو(ودانیزو) برخو کی تر څو د باکیفیته معیاري اکاډمیکو خدمتونو وړاندي کولو ته لار هواره شي.

ارزښتونه(Values)

با کيفيته لوړي زده کړي
د ملي يووالي ټينګښت
اخلاق او کرامت
انډولتیا
سالمه اداره ،اغیزمنتوب،ګټورتوب
د پوهنځی اکاډيميکه آزادي
حساب ورکونه
د نیوکو دمنلو د فرهنګ دودول
سالمو علمی سیالیو ته لار هواره ول

د پوهنځی د پرانیستلو د اړتیا عمومي ارزونه

کندهار ولایت د هیواد په کچه د ډیرو وګړیو په درلودلو سره د هیواد له لویو ولایتونو څخه شمیرل کیږی او تر څنګ یي د سهیل لویدیځي حوزي نورو څیرمه ولایتونو لکه زابل،ارزګان،هلمند ته د ډیرو فعالیتونو لکه سوادګري،صنعت،ښوونیزو،روزنیزو او په ځانګړي توګه د نسبتآ پرمختللو روغتیایي خدمتونو د وړاندي کولو د مرکز حیثیت لري،د کندهار ولایت پورتنیو ځانګړتیاوو ته په کتو سره د میرویس نیکه د لوړو زده کړو مؤسسې طب پوهنځی په دي ولایت کي د لاندي اړتیاوو پر بنسټ په کندهار ښار کي پرانیستل شو

دا چي د هیواد کابو شپیته سلنه وګړي ځوانان دي او ډیری دا ځوانان زده کړو په ځانګړي توګه لوړو زده کړو ته لیوالتیا لري او د اقتصادي ستونزو له امله نه شي کولای تر څو د هیواد څخه بهر خپلي زده کړي تر سره کړي
په سهیل لویدیځ زون په ځانګړي توګه کندهار ولایت کي د لوړو زده کړو موسساتو لږوالی،په دي ولایت کی یوازي یودولتي پوهنتون د یوه طب پوهنځی په درلودلو سره نشوای کولای تر څو په زیاته کچه محصلین جذب او د روغتیایی کارکونکو د لږوالی تشه ډکه کړي.
د طب په برخه کي دMD په کچه د ځوانانو روزل تر څو له دي لاري د فارغانود ماستری،دوکتورا، تخصصي او فوق تخصصي زده کړو ته لار پرانیستل شي او د ماستری، دوکتورا، تخصصي او فوق تخصصي زده کړو د تر سره کولو له لاري د پر مختللیو روغتیایي خدمتونو د وړاندي کولو،د عامي روغتیا په برخه کي د څیړنود تر سره کولو،د ناروغیو د پتالوژیک اړخ په برخه کي د علمي مطالعاتو او څیړنو د تر سره کولو،د ناروغیو د کنترول او محو کولو جوګه شي او هم به له دي لاري پوه او مجرب کادرونه د افغانستان د روغتیا سکتورته وړاندي شي او له امله به یي هیواد د یوه معیاري او په نړۍ واله کچه منل سوي روغتیا یي سیستم څخه برخمن شي.
ښځینه محصلینو نه شوای کولای د کورنۍ او ټولنیزو ناخوالوله امله د خپلي خوښي وړ پوهنځی کي له هیواد بهر یا په نورو ولایتونو کی زده کړي تر سره کړي
په ټول هیواد په ځانګړي توګه سهیل لویځ زون کی زیاتو روغتیایی کارکونکو (ډاکټرانو) ته اړتیا چی یوازي دولتي طبي پوهنځیو نشوای کولای دا تشه ډکه کړي.

د پوهنځی اداري جوړښت

د پوهنځی رئیس ټولي اداري او اکاډمیکي چاري د لوړو زده کړو وزارت دنافذه قوانینو،لایحو، مقرراتو او طرزالعملونو په رڼا کي او هم د مؤسسې د عمومي رئیس د لارښونو سره سم څاري، د پوهنځی ریس د پوهنځی د علمي شورا د مشرتوب مسولیت هم لري،د پوهنځی مرستیال تر ډیره د استادانو اړوند چارو د تنظیم په برخه کي مرسته کوي.پوهنځی یو مدیرلري او د پوهنځی د تدریسي چارو اړوند کړنو د تر سره کولو مسولیت لري او د اداري چارو په برخه کي د پوهنځی له نورو کارکونکو او استادانو سره مرسته کوي.

د پوهنځی تشکیلاتي جوړښت په لاندي ډول دی.